Kryediplomati i Moskës, Sergey Lavrov ka deklaruar se Rusia nuk dëshiron një konflikt të armatosur me Ukrainën, por do të vazhdojë të ndërmarrë hapa për të mbrojtur veten.

Reagimi vjen pasi Kievi ka përsëritur pretendimet se Kremlini mund të urdhërojë një ofensivë kundër Ukrainës.

“Rusia nuk do të dëshironte të zgjidhte rrugën e konfrontimit, megjithatë, zgjedhja varet nga partnerët tanë. Fakti që autoritetet amerikane kanë qenë mjaft të shpejta në organizimin e kontakteve të ardhshme, besoj se është një shenjë pozitive. Gjithsesi Rusia ka të gjitha aftësitë në vend për të siguruar një përgjigje të plotë ushtarake dhe teknike ndaj çdo lloj provokimi që mund të shpaloset rreth nesh”.

Vërejtjet e kryediplomatit vijnë në mes të tensioneve në rritje në lindje të Ukrainës, me një numër zyrtarësh perëndimorë dhe media që pretendojnë se forcat ruse po ndërtohen pranë vijës së demarkacionit si një pararendës i mundshëm për nisjen e një pushtimi në shkallë të plotë të fqinjit të saj.

Kremlini i ka hedhur poshtë vazhdimisht akuzat, duke argumentuar se ato janë të pabaza dhe vetëm ilustrojnë një “histeri” të përhapur në shtyp.

Moska në vend të kësaj ka akuzuar Perëndimin për inkurajimin e zyrtarëve të Kievit për t’u përfshirë në provokime anti-ruse.

Konflikti në lindje të Ukrainës shpërtheu pas ngjarjeve të Maidanit të vitit 2014, kur qeveria e zgjedhur u përmbys pas protestave të dhunshme, me republikat e vetëshpallura të Lugansk dhe Donetsk që deklaruan autonominë e tyre nga Kievi.

As Rusia, as Ukraina dhe asnjë shtet tjetër anëtar i OKB-së nuk i njeh ato si kombe sovrane.